يوميات طبيب عراقي جراح ...

يوميات طبيب عراقي في الجراحيه

هلااااا حبايب
شلونكم وشنو الاخبار
ان شاء الله زينين
رح اخذكم وياية بالخفارة مال الطوارئ لان ضايج وحدي , بالبداية الخفارة عدنا تتقسم الى 3 اوقات , 8-4 و 4 – 12 و 12 – 8 , وكل وقت بيه مشاكل وحالات تختلف عن الي وراه , ونبدي بخفارة 8-4 , وهذا عدي احلى وقت لان اني الزم بيه وية طبيبات اثنين وحدة احلى من الخ بس بنفس الوقت هذا الوقت المزعج بيه انه اذا صارت مشكلة لازم متشلع لان ( الحرمة بشارب الخير ) و تصير سوبرمان وتحارب كل من يحاول يتحارش , بس الحمد لله احنا شعب واعي ومثقف وانتخبنا وما عدنا هيج سوالف ؟؟؟؟؟؟؟؟
وتبدا الخفارة........

ها دكتورة كلشي ماكو

وبعد قليل تبدي البشائر والاصوات الي صارت مثل اغاني كاظم الساهر بالنسبة الي الأ وهية صوت الاسعاف وينزل من السيارة مريض واحد وعشرين مرافق وتبدي الهوسات

وين الدكتور الولد راح يموت شنو احنا لو ندري هيج المستشفى منجي ( وغيرها من كلمات نزار قباني )
وتسرع احدى الطبيبات لفحص المريض وتتلقى الشتائم و........ في الطريق واسالها :
ها دكتورة شبيه.......
ماجوس ( والكلمة مشتقة من اول 3 حروف لكلمة هستيريا )
- بالكم ترة اطلع واخلي المريض يموت
لا دخيلك دكتور
- شنو هوة متعارك بالبيت لو عدكم مشكلة
والجواب المتوقع هوة بكل صراحة :
- لاااااااااا شلك علينا
- زين كلكم طلعوا ودخلولي المريض بغرفة الفحص
وندخل اني وصادق الممرض الى غرفة الفحص و ويانا المريض طبعا ونقفل الباب
ونبدا مرحلة علاج الهستيريا , نبسطة بسطة الا يكوم يصيح والله طبت
ويطلع المريض يمشي على رجلة والنسوان تبدي تهلهل ويصيحون
- دكتور شنو انتة سيد خومو سيد

ويجي المريض الثاني والثالث وتبدي الهوسة ويجي الرابع وطبعا كلهم مو هستيريا اكو حوادث وطلق ناري وتسمم واذا الله يحبك ليدزلك واحد سكران لان كلشي متكدر تشتغل , وبنص هاي الهوسة الصدرية البيضة تصير حمرة والعطر يطير والهدوم تروح للزبل لان محد يقبل يغسلها بعد
ويجي تفتيش من الوزارة البطلة الي مخليتنا ممحتاجين كلشي ,
ويجي وكيل الوزير صاحب احلى ضحكة ؟؟؟؟؟؟؟؟ وين المقيم الاقدم ,
واطلع اني من نص الهوسة والي يشوفني عبالة اني جنت دا انقذ
الجندي رايان ........- انتة المقيم الاقدم.......
- نعم استاذ ( هاي الكلمة الها مفعول سحري بكل عصر )
- هاي شنو الهوسة
- لا ماكو شي بس عشر مفخخات وعشرين طلقة وتلث حوادث ومصرانين
اشو اليوم كلشي ماكو هادئة الطوارئ
- الحمد لله استاذ بفضل قيادتك الحكيمة للامور
- زين لعد انتة ليش مبهذل , يلة روح عقوبة الفات نظر لان الطبيب باحلك الظروف لازم يحافظ على مظهرة؟؟؟؟؟؟
شكرا استاذ هاي نصيحة ابوية لازم استفيد منها ( هاي اللواكة مطلوبة لان وكيل الوزير مشهور بتعذيب الاطباء واكو جوة المكتب مالتة غرفة مال تعذيب و بيوم من الايام اخذوا طبيب وحبسة بهاي الغرفة وظل ينبسط الى ان عموا وحدة من عيونة والتهمة مال الطبيب وهابي والمشكلة طلع الطبيب شيعي وهسة الطبيب بعمان )

يطلع وكيل الوزير ويركب السيارة ويولي قصدي يروح .

ونبدي بالمرضى , المريض الاول مصاب بطلق ناري
- شوكت انضربت
- البارحة بتلاثة الصبح
- شجنت تسوي بتلاثة الصبح
- طالع من الجامع ورا صلاة العشا وما ادري لا وجتني الطلقة؟؟؟؟؟؟؟

المريض الثاني وهو مصاب بحادث سيارة
- عمي شوكت اندعمت
- اليوم بالستة الصبح
- شمطلعك بالستة الصبح
- رحت اجيبن صمون وما شفت نفسي الا وداعم الهمر اي ابني اني ابو الصوج مو الامريكان , خطية همة لازمين سايدهم بس انا تعديت ؟؟؟؟؟؟؟؟

المريض الثالث مصاب بكسر في الرجل اليمنى
- شلون تعورت
- دكتور اني مو المريض اني اخوه
- وين المريض
- راح يتمشى ضاج من النومة

المريض الرابع , عضة كلب
- حجي شوكت انعضيت
- بالخمسة الصبح
- وهسة الا تصلي بالجامع صلي ابيتكم
- لا دكتور طلعت ارش الحديقة ورشيت الجلب وكمز علية

المريض السادس , حالة سكر وشرب الكحول وهذا احلى مريض لان جماعتة جايبي
- شنو عدك
- دكتور اني ورا مجريت البيك العاشر ورا اخذت لبلبي اتذكرت البزونة مالتي وشلون دعموها ولد الحرام وبطني لزمتني , ولكم وين تروحون مني اكتلكم اكتلم , مو رب العالمين يكول ولكم في القصاص حياة هااااااا
- على كيفك وين توجعك
- شنو وين اكلك بطني شنو انتة هم سكران
- ادري وين ابطنك
- هنا براسي
- هسة راسك لو بطنك
- انتة مو دكتور انتة التعرف لو اني
- فضني ورايا شغل
- اني اعتقد السبب راسي لان من فكرت كامت بطني توجعني مو تمام شباب
- والله صحيح , هوة البارحة حتى مشرب هواية

المريض السابع , قرحة بالمعدة
- هاي شنو العشيرة الي ويا
- دكتور هذا جبيرنا ولازم نوكفلة انتة شتريد تتدلل
- زين روحوا لمصرف الدم وجيبولة فد خمس بطالة دم
- زين شنو يبيعوهن
- لا لازم تتبرعون
- بس دكتور اني بية سكر وهذا بي ضغط وابو فلان عدة فغردم و.........
- انتة حتعددلي العشيرة انتو مو اهلة
- لا
- لعد شنو
- احنا هيج خطار عد جيرانة!!!

ودمتم سالمين

ههههههههههههههههههههه

يسلمو غسان

والله هذا هو واقع وحال المستشفيات الي عدنا

يسلمو خيو الله يعينهم شو بيشوفو بهاي المستشفيات

تقبل مروري

مشكور اخوية على الموضوع الرائع بارك الله بيك

مشكور اخوية على الموضوع الرائع بارك الله بيك

» لكم عـراقكم...ولي عراقي
» لكم عـراقكم...ولي عراقي
» بفراكك (شعر شعبي عراقي)